थाहा नगरमा प्रधानमन्त्री देउवा आउने

लोकतान्त्रिक गठबन्धनको आयोजनामा थाहा नगरमा हुन लागेको चुनावीसभामा सहभागी हुन प्रधानमन्त्री शेरबहादुर देउवा मकवानपुर आउने भएका छन् । १४ गते बिहीबार थाहा नगरमा हुन लागेको चुनावीसभामा सहभागी हुन देउवासहित केन्द्रीय नेताहरु थाहा नगर आउन लागेका हुन् । नेपाली काँग्रेसका सभापति समेत रहेका देउवासंगै राप्रपाका केन्द्रीय अध्यक्ष एवम् उपप्रधानमन्त्री कमल थापा तथा काँग्रेस र राप्रपाका अन्य केन्द्रीय नेताहरु थाहा नगर आउने काँग्रेस मकवानपुरका प्रवक्ता प्रदीप कोईरालाले जानकारी दिए । राप्रपाले पार्टी अध्यक्ष एवम् उपप्रधानमन्त्री सहभागी हुने गरी १४ गतेका लागि क्षेत्र नम्बर १ मा तय गरेको अन्य कार्यक्रमहरु स्थगित गरेको छ । थाहा नगरमा हुने सभामा पार्टी प्रवेशको कार्यक्रम समेत रहेको काँग्रेस मकवानपुरले जनाएको छ ।