प्रमोद खरेलको नयाँ गीत ‘दन्तैमा...’ सार्वजनिक (भिडियोसहित)
आधुनिक नेपाली सुगम गायन धारका लोकप्रिय युवा गायक प्रमोद खरेलको नयाँ गीत ‘दन्तैमा...’ आज मंगलबार सार्वजनिक भएको छ । यो नयाँ गीत गायक खरेलको आफ्नै अफिसियल युट्युब च्यानल ‘सिङ्गर प्रमोद खरेल’ बाट आज अपरान्ह रिलिज भएको हो ।
यो गीतका कम्पोजर शंकर स्माइल हुन् भने गीतको रचना डिपी खनालले गरेका हुन् । दीक्षा क्रियसनको प्रस्तुति रहेको यो गीतमा सुनील क्षेत्री, प्राञ्जली सापकोटा र नेपाली ठिटोजको जीवन्त एवम् आकर्षक अभिनय रहेको छ । अभिनयका साथै नेपाली ठिटोजले यस गीत–अभिनयमा कोरियोग्राफी पनि गरेको छ भने यसलाई सुनील क्षेत्रीले निर्देशन गरेका छन् ।
‘झुम्कावली’, ‘लाइ देउ न मायाले’ भन्दा फरक प्याटर्नमा रहेको भनिएको यो गीत डान्सिङ बिटमा आधारित रहेको छ जसले स्रोताहरूलाई झुम्न विवश पार्नेछ । काठमाडौंको सुन्धारा र सातदोबाटोस्थित एन्फा कमप्लेक्समा छायांकन गरिएको यस गीतमा डान्स गर्दै दर्शक स्रोता मज्जाले रमाउन सक्ने उनी बताउँछन् ।आधुनिक संगीतमा आफूलाई स्थापित गर्न सफल गायक प्रमोद खरेल करिब एक दशक यता लोकप्रिय गायकका रूपमा सु–परिचित छन् । चलचित्र ‘पल पलमा’ को ‘यो अँगालोभरिको माया...’ मार्फत चलचित्रमा पाश्र्व गायनसमेत थालेका खरेलले करिब एक सयभन्दा बढी चलचित्रका दुई सयभन्दा बढी गीतमा स्वर दिइसकेका छन् ।
स्वदेश तथा विदेशका कन्सर्टमा उत्तिकै सक्रिय खरेल हरेक कार्यक्रममा आफ्ना एक दर्जन बढी लोकप्रिय गीत प्रस्तुत गर्छन् । प्राप्ति, सेन्टिमेन्ट्स, प्रणय, प्रवेग, निर्झरी तथा हंगामालगायतका आधा दर्जनभन्दा बढी एकल एल्बम बजारमा ल्याइसकेका खरेल म्युजिक भिडियोमा पनि संगसंगै काम गरिरहेका छन् ।
